عطلة العيد بداية لموسم الحداق

عيدكم مبارك وعساكم من عواده لنعود اليكم مع بداية الموسم البحري ومع النواخذة والحداقة واخبار واسرار الصيد ولتكون عطلة عيد الفطر انطلاقة الي محادقنا الشمالية والجنوبية حيث يتردد هالايام أين يقضي عشاق الحداق عطلة عيد الفطر؟.
وما المحادق التي تكثر وتتنوع فيها الاسماك الطيبة والاوقات المناسبة؟ وهل صحيح ان من يبحث عن السبيطي يجده على الطبعانات والسواحل الشمالية؟ والشعم طافح بالحيشان وصوب الرشدان والشيمة عند القفص البحري وعلى كفة الخور وعارض عوهة، واسرار الييم هي «لحم العجل»، والمايات لازم على ردة الثبر وأول السجى، ولازم يكون خيطك ركه، وغيرها من المعلومات ستجدونها من خلال هذا الاستطلاع مع حداقة مخضرمين ولهم من الخبرة والباع الطويل مع البحر والصيد.

في البداية يقول الحداق المخضرم علي الخياط: دلق سهيل يكون في اواخر الشهر وتباشيره طيبة وقبل ايام تعدل الجو وبرد اخر الليل والفجر ونقول لأهل البحر والحداقة كل عام وانتم بخير وان شاء الله متوقعين هالسنة صيدا طيبا مع بداية الموسم. خاصة ان الشعم تارس البحر والسبيطي على الطبعانات والشيمة طافحة واذا زارتنا امطار خفيفة هالايام يكون فعلا فتحت فصــل الخريف ببـشـاير طيبة وتنخفض معها درجات الحرارة.
وقال: اللي يسأل عن الشيمة نقول له موجودة بالحيشان وصوب القفص البحري وعارض عوهة وعلى كفة الخور واحجامها مخلوطة عودة وصغيرة وتضرب على محايات زورية او يميامة او ميدة، وهالايام ترغب الزورية الحية وخيطها 80 او 90 ويكون الميدار ساقه طويل اما اذا كان خيطك ناعم 60 او 70 لازم يكون مسيم، وافضل ماية للشيمة هي آخر السجى ودورتها بالثبر.

الشعم حاضر
ويقول الخياط: الشعم طافح وينصاد في كل المحادق، خاصة المثلوث ويضرب هالايام على الشريب، اما العود فقليل، ومن افضل محادقه الحيشان وام عروق والرشدان داخل الدوحة وصوب الميناء.. وخيطه المتعارف عليه 30 او 35 ولازم يكون ركة.
وقال: السبيطي ملك الاسماك وحبيب الملايين من الحداقة وتخيل بالليل في منامي اتحلم فيه.. ويا زينة بالخيط ايونسك ومن كثر تولعي فيه ادخل له في كل الاحوال الجوية وعلى مايات واوقات لازم اصيده.
وهالايام يتواجد بالحيشان والطبعانات وعوهة وصوب مسكان والفنطاس الجنوبية والاسياف المقابلة لسوق شرق بامتدادها حتى القصر، وعموما كل مكان له مايته ولكن الافضل ردة الثبر وساعات في اماكن اخرى يرغب السجى وخيطه طبعا ركه.

لحم العجل
ويقول سالم النبهان: السبيطي مو سهل وجارح وشرس ويهاجم ومن الاسماك القوية، والسبيطي ما ينبر بالخيط اييطقها ويمشي واحيانا يكون عاض الييمة بالطر ولازم اتسايسه.. ومن اسرار ييمة السبيطي ييمة لوطقها النويتف ما تتأثر وهالايام يستخدم له الحداقة الكبار لحم العجل او الكبدة يستذبح عليها واحيانا يرغب اليوافة واوقات يبيله سلس واتذكر في احدى طلعاتنا كنت احدق للسبيطي ومنزل خيطين وضرب الحبيب على الخيط الاول وكانت ييمتي يوافه وضرب ايضا على الخيط الثاني، ولما سحبته فاجأني بان الميدارين في حلقة واعتقد وقتها كان جوعان ومفتلت على اليوافة.

تجهيز وصيانة الطراد
واضاف: الايام المقبلة يبدأ الجو في التحسن ويبرد الليل قليلا، ويشاهد سهيل في سماء الكويت، ويذكر فلكيا ان هالايام بداية لامطار الخريف، خاصة اذا زادت كمية الرطوبة.
ويلاحظ تواجد ومرور الطيور المهاجرة، واولها طير الهدهد، ويقول اهل البحر اذا الهواء شمال احدق جنوب، واذا الهواء كوس احدق شمال.
وتباشير دلوق سهيل بينت في محادق كبر ومحادق عوهة والحيشان فيها خير، وكذلك الفنطاس والفنيطيس والمسيلة، ومعظم الحداقة موجودون في محادق عوهة متولين الشعم على الشريب والمصير.

دلوق سهيل
وتحدث النبهان عن بداية موسم الصيد مع بداية دلوق سهيل وعن الشعم ومتعة صيد السبيطي، وقال يعتبر موسم دلوق سهيل من افضل مواسم السنة بالنسبة للصيد، ويبدأ من اواخر شهر اغسطس الى منتصف شهر نوفمبر والاسماك الطيبة تكثر في هالوقت من السنة وتبتعد الاسماك غير المرغوبة. وقال: من الاسماك التي تكثر بهالوقت الشعم والنويبي والبالول والسبيطي والسكن وفرخ الشماهي وغيرها وافضل المحادق في العيد عوهة والحيشان والركسة ومسكان وما فوق الى اقواع الــ25.
ويقول النوخذة نوري الشماع: أجمل التهاني والتبريكات بحلول عيد الفطر المبارك، اعاده الله على الامة الاسلامية قاطبة باليمن والخير والبركات، وخوش عطلة للحداقة عساهم من عوادة والحداق فيهم يعتمد على الماية والعمق واتجاه الريح وموسم الحداق بدأ فعلياً والسمجة الطيبة موجودة وتنصاد حالياً بكميات واحجام طيبة والحداق المفروض يكون كلما خفت جرة الماية يكون اتجاهنا بالحداق للغزر او نحدق قرب المجرى افضل، حيث تكون الماية جاره.
وأضاف: السبيطي موجود على العوارض والحواد في بحر من 6 فيت الى 14 فيت ويضرب في وقت رخة الماية، عاد انت احسبها، لان في اماكن تكون قريبة من خارور او خور وتحتاج تنتظر آخر الثبر علشان ترخ الماية وطبعاً بالحمل يختلف الوضع عن الفساد، لأن بالفساد رخة الماية تطول اكثر وتلقى الحداقة يصيدون كمية طيبة من السبيطية، وعطلة العيد نقدر انحدق بالغزر حق الشعم الاصفر واللي بدأ يبين بالاطيان وبكميات حلوة.. يمكن يأذيك الوحر شوي، بس ما عليه نقدر نستحمل الوحر علشان نصيد الشعم والسبيطي يمووت على الزورية اللي بدت تقل على السيف والشعم ماله جبد على صلاخة الميد وحدة بوحدة طبعاً الشعم الاصفر الادغم.. اما بالنسبة للشعم الابيض الدولار حاليا ينصاد على الربيانة.. وكل ماله ويزيد مع زيادة البرد بس اليميامة والمجوه إمناشبينه شوي.

عطلة العيد.. جوها بحري
يقول الشماع: طبعاً الهامور بين بالمحادق الجنوبية وبدأ يبين بالمحادق الشمالية، وتلقاه في كل الاعماق وتحصله بكثرة في الارض الصخرية والقوعة، وكلما زاد العمق كبر الهامور، لذلك نجد الهوامير بالركسة احجامها كبيرة بالمقارنة مع هوامير قوعة الدعية مثلاً.. واحسن دوا حق الهامور المحاياة خاصة اذا سمجة بيضة مثل الشعم الصغير وحدة بوحدة، واذا ما حصل فما لنا الا اليميامة هم ما يطوفها بعد، المهم ان المنتب يكون جاهز يمك.
وأضاف الشماع: بعد الصراحة مو مال سفر بهالعطلة دام الجو حلو والبحر والحداق آخر حلاوة بعد الحين الواحد ما عنده عذر.. الحر وراح ولازم نستمتع بالحداق الحلو ومنت محتاج انك تباعد وتخاطر بنفسك لان عطلة العيد فعلا جوها بحري.

دعوة
هذه الصفحة تهتم بامور البحر والصيد، واذا كانت لديك عزيزي القارئ اي مشاركة او استفسار فيمكنك الاتصال على هاتف 24812822 داخلي 288 - 231 او ارسالها على فاكس 24813768 او على العنوان البريدي لــ القبس. او بريد الصفحة الالكتروني

[email protected]

iNewsArabia.com > سياسة > القبس | سياسة
عطلة العيد بداية لموسم الحداق,