شن المعنى يا اب جاعورة .. قصيدة/محمد عبد الرحمن عبد المعروف

شن المعنى يا اب جاعورة وشن القاصدو
بفزورة التغيير
طلع تمساح .. دخل دابى

ولدغ بدل الصباع اتنين
تقول تغيير
ده كلو سخف

باسم الدين حكمتو الناس

وبالقانون صبحتو انجاس

مرق عثمان دخل عباس

وصل غندور ملاء التلفاز

بلا انجاز

لاهامينا تغيرك

ولابيعنينا تفكيرك

كل الناس يهمها تغور

وتستقبل مصير لاهاى
اما الشرزمة الباقيين

مصيرهم برضو شين فى شين
ديل سارقين
بقوة عين

مرق برميل .. دخل دولار
وصل ماليزيا رمشة عين

اما الموت ده حقوا براه

فى دارفور كتلتو الناس

جبال النوبة قصف فى الراس

التغيير

بحق وحقيقة يا بشبوش

تغور انت ويغور غيرك

ونقفل سكة الكيزان

دروب الافعى والدابى

لانسمع كلاما شين

لايطاول اب عفين

لايمغصنا

لمبيكا

لاتزعجنا بامريكا

وشعارات النفاق المر

اذن يا افة السودان

ويامن رسخ الاحزان

وحير حتى للشيطان

ده ما تغيير بيعنينا

بيعنينا

نرجع ضحكة الاطفال

ونتعايش مع الامال

ونهدى فرحنا للاجيال

محمد عبد الرحمن عبد المعروف

22/12/2013

iNewsArabia.com > أخبار مختلطة > سودانيز اونلاين
شن المعنى يا اب جاعورة .. قصيدة/محمد عبد الرحمن عبد المعروف,