ياسين العياري يواصل تحدّيه للجنرال عمّار معلّقا على ما قاله في برنامج التاسعة مساءا

كالعادة ، لا يفوّت ياسين العياري فرصة حتى يتحدّى فيها الفريق أول رشيد عمّار، وهذه المرّة على خلفيّة البرنامج التلفزي المباشر التاسعة مساءا الذي بث مساء الاثنين على قناة التونسية.

وهذا ما قاله ياسين العياري عن الجنرال عمّار :

سمعت مثل الجميع خبر إستقالة الجنرال السابق رشيد عمار

سأبدأ التعليق على الطريقة :
إش معناها جنرال يحكي في التلفزة! هو عسكري تحت سلطة سياسية ينفذ الأوامر، ما عندوش الحق يحل فمه! وزير الدفاع يحكي مع المدنيين! بالك في الإكوادور أحنا و إلا في بورما! بلاد 3000 عام حضارة رئيس أركان يستقيل على المباشر! إيهاب توفيق يعلن إعتزاله هو؟! ملا ريق و تهريج!

و حتى إعلانه الإستقالة مازال عسكري و بعد الإستقالة عليه واجب التحفظ، يعني المفروض يتحاكم علي عمله البارح! سرك عمار البلاد؟!

طريقة كلامه، مظمون كلامه، المفروظ يتحاكم عليه لتحقير الجيش الوطني : نصف كم x نصف كم يجيو كم²! ولية تحمي في البلاد! جندي مدرب و مسلح يسخايب صاحبو “شبح”، و السيد في الشعانبي ولا ي”سهل” في الطبيعية! طلع جنرال أكتيفيا السيد

هانو أنباء بعد الإستقالة على نزول الولي الصالح كمال اللطيف لابس جبة خضراء يلم في الألغام في الشعاني! هذا رئيس أركان؟ تي هاو عزام! مهازل و الله!

لكن وسط التهريج و التسطيكة و الصورة التعيسة الي عطاها لكلمة ضابط، فمة حاجات مهمة انجمو نستشفوها :

جنرال يدبر على حمادي الجبالي، و حمادي الجبالي ينفذ! جنرال يعمل في السياسة! سابقة خطيرة و تحوي في طياتها الكثير الكثير
ربما التونسية على الطريقة السبسية، تشابه خروج الجبالي و خروج عمار تؤكد ما يعلمه الجميع و لا أحد يتجرأ على قوله : حمادي الجبالي و رشيد عمار في حلف : لا النهضة لا الإسلام لا الوطن : الساحل أولا، حلف يقوده كمال اللطيف : هو يدبر عليهم و يكلملهم بن غربية باش يعمللهم التجميل و يعطيهم الأسئلة بالمسبق و ما يغششهمش

قضاء يحشم من الجنرال السابق، يولي هو الي يمشيلو باش يقدم شهادتو : الحشمة وصلت لإخفاء القناصة و القتلة على ما يبدو! العميد بو قرة هانو في الإقامة الجبرية و تحت تهديدات بالتصفية الجسدية

يحب على مخبرين.. كلام كان يتسمع لو يعلمنا يمصير 3 قاعات كاملة من وسائل التجسس على المواطنين هاتف أنترنات و فاكس الي كانت في قصر قرطاج و الي تسلمها و الي ما تخضعش لحتى رقابة سياسية أو قضائية

لم يختر كلمة “سفير” عبثا! هو يكذب، كل الضباط يعلمون المحاولة اليائسة الي عملها في عهد السبسي ليقع تعيينه سفير تونس في قطر

بقية كلامه تخلويض و ضحل و فارغ و لا يستحق التعليق عليه

أراد زعمة إنه يخرج من الباب الكبير و يبندر لروحو.. إن شاء الله يكونو مخبريه أعلموه إنه الزغاريط تعالت في الأحياء العسكرية في باجة و قابس و العوينة و بنزرت و قصر سعيد، و الي الضباط تتبادل في التهاني لإنزياح من كان جاثما على أنفاس الجيش يقوده بعقلية “حظرت ساعتو” و “سيدي محرز”

تحية لبن غربية إلي حل ورشة طولة و دهينة بعد تجميل شيبوب و تسمع و تسكت متع سيدو الباجي.. عمل حجامة و لحية و صبغة للي بعثهوله كمال اللطيف للتجميل

ما قد لا تعلمونه، أنه منذ شهر ماي، أعمل بجد مع أخي مطيع لإجبار رشيد عمار على التقاعد : تعدى السن الأقصى و قرار التمديد الذي أصدره المرزوقي غير قانوني
إتصلنا ب6 محامين لرفع قضية لدى المحكمة الإدارية لإبطال قرار التمديد مما يحيل رشيد عمار للتقاعد وجوبا
المحامين الستة، واحدا تلو الآخر، خافو و رفضو القضية
بقينا نعمل مع صديق قاض متقاعد لبناء ملف القضية و تخطي عقبة “إنعدام الصفة و المصلحة” و كان من المفروض أن نقدم القضية خلال الأسبوع المقبل

في الأثناء إتصل بي عميد متقاعد و ديبلوماسي بعلولي سابق مقيم في باريس ليحملو نفس الرسالة :”فك عليكم، هاو ماشي بطبيعتو”

ربما العديد من الضحايا سيتشجعون الآن
ضحايا براكة الساحل
العقداء الذين رفتو فقط لأنهم رفضو أن تقوم الهندسة العسكرية ببناء منزل الجنرال و ما جاوبوش مليح على مرت الجنرال
أهل “بدر” الي لما بدات تتكلم عن علاقة “خاصة” برشيد عمار، تضربت بسكينة في قابس
“مرت الكماندا” الي السرياطي صور العلاقة الخاصة ،و اليوم يحاكم على ذلك
الفساد و التكمبين في صفقات الأسلحة و فلوس الأمم المتحدة
العريفة الي اشتكاته للتحرش الجنسي فتم رفتها و تهديدها هي و الضابط الي شهد معاها
ربما تسترد الدولة، الأمتار و الأمتار المربعة الي بناتها بنته على الكياس و سكرته بدون رخصة
ربما يتحرك القضاء في شبهات تخابر مع أجهزة أجنبية..
القائمة تطول و تطول..

مزال عندك حديث بعد الكسوة يا رشيد عمار، أكيد! مع المدعي العام لمحكمة الجنايات الدولية

في الإخر، نقعد عياري، و أولاد عيار ما يذبحوش “الجيفة”، جبدتلو فيشاتو و تحديته بإسمي و لقبي لما كانت ترتعد من ذكر إسمه الرجال، أتركه الآن لفرسان الساعة 25 باش يعملوه تكركيرة : توة مدني منهم ليه، وهو تكركيرة بطبعه، اليوم سأحتفل ككل من له علاقة بالجيش بإختفاء أحد الأزلام، و غدا أمر : مزال العجيمي، مزال “مدير ديوان وزير الدفاع”.. صناديق سود يجب فتحها لنصل إلى حقائق مقتل كل شهداء الثورة و كل أبطال الجيش الوطني من المرحوم العقيد الطاهر العياري وصولا إلى الوكيل سفيان بن جمالة

iNewsArabia.com > أخبار مختلطة > Tuniscoop